6 de agosto do 2021

Xisco Feijoó presenta Peixe en directo en Vigo,

Pontevedra e no Intercéltico do Morrazo.

Vigo, 23 de xullo de 2021.- O cantante e bailador Xisco Feijoó presentará a semana que vén  en directo, en Galicia, o seu primeiro traballo discográfico, Peixe. Serán tres as citas nas que se poida gozar, ao vivo, dun álbum e espectáculo que achega unha visión contemporánea sobre a música de creación colectiva. Vigo, as Festas da Peregrina de Pontevedra e o Festival Intercéltico de Moaña serán as tres primeiras paradas desta xira, que augura alegría, orgullo e contemporaneidade.

Con Peixe, Xisco Feijoó pretende achegar, desde a súa óptica particular, unha visión atrevida, moderna e contemporánea sobre a música de creación colectiva galega. O disco, composto por dez temas, pon en valor o papel da cantiga tradicional, da que o artista salienta a súa identidade e significado propio, e sobre as que que fía un relato de historias con tintes autobiográficos e conectadas por un eixo común: a diversidade humana.

“Peixe fala de sentimentos, de sensacións, de querencias e de desexos. Fala de todo o que queremos ser e non somos quen. E do que somos e non desexamos. Fala da aceptación, de deixar atrás a resignación, e de entender que, entre nós, non hai gaiolas nin peixeiras que nos pechen. Peixe somos cada un de nós, únicos e irrepetibles”, sinala Xisco Feijoó.



O primeiro concerto terá lugar en Vigo o próximo luns, 26 de xullo. A cita será na parroquia de Beade, na Igrexa de San Estevo, e comezará ás 21.00 horas. A segunda cita da semana que vén  será no Morrazo: Xisco Feijoó actuará o 31 de xullo, ás 22.30 horas, no XXXVII Festival Intercéltico do Morrazo, en Moaña. Finalmente, o vindeiro 9 de agosto, o cantante e bailador actuará na Praza da Ferrería (22.00 horas), en Pontevedra, no marco dunha nova edición das Festas da Peregrina.

Politica de privacidade

Aviso Legal

Copyright © 2021 Tódolos dereitos reservados por Xisco Feijoó

Presentación de ‘Peixe’ na Deputación de Pontevedra

Xisco Feijoó presentou o seu novo disco, Peixe, este venres 6 de agosto no Pazo Provincial da Deputación de Pontevedra, da man da Presidenta do ente provincial, Carmela Silva.

 

O cantante, bailador e coreógrafo deu a coñecer o seu novo traballo, publicado no mes de xullo, que considera “un soño que representa moitas vivencias e recordos durante moitísimos anos de recollidas polas aldeas”. Peixe é un álbum de dez pezas que rende homenaxe á cantiga galega e nas que o artista pon en valor a música tradicional desde unha visión contemporánea, á vez que salienta o papel das mulleres como grandes conservadoras da tradición oral e musical en Galicia.

No acto de presentación, a Presidenta sinalou que o disco, que se presenta nunha orixinal lata de conservas, será o asagallo institucional do ente provincial neste 2021. “Que mellor que entregarlle a quen nos visita o noso corazón, a nosa cultura, o que somos, nun formato extraordinario, metido nunha lata de conservas, que é tamén a nosa tradición económica”, explicou Silva.

Neste sentido, Feijoó explicou que o singular formato de Peixe “representa esa lata na que todo é perdurable, a perdurabilidade das nosas tradicións e dun sistema económico que fixo levantar toda a nosa costa, que é tan noso, con tantas mulleres traballando nas conserveiras e tantas mans no salitre”.